小插曲 + 再次踏入倫敦

已經三個月沒有開 post, 因為... 家有白事, 九十多歲的嫲嫲走了。中秋前一晚返了香港。

又由於 12 月要出席好友婚禮 (早已買了機票去峇里), 又唔想搭多轉長途機, 結果呢三個月我一直留在香港, 又或者係把工作假期暫時搬回香港, 做了兩個月小巴司機

呢一刻覺得之前考的巴士牌同埋兼職車長的工作經驗很有用, 只係收入大不如前。每日訓到黃朝白晏先起身開工, 深夜收工回家 hea 陣就訓覺, 放假就約下朋友食飯同陪下家人, 感覺比在英國更似工作假期。


在香港的時間都是返上水鄉郊線 50K (坑頭), 51K (河上鄉) 為主。

又很幸運地在香港約了一些即將出發到英國的新朋友, 使我在出發前識多一班人, 令我再次踏進英國時沒有咁孤單寂寞同凍...



最後, 在一堆白事紅事過後, 昨天清晨, 我帶著忐忑不安的心情再次踏進大不列顛島...

坦白講, 這兩日不太提起勁去找工作, 一來我真心不喜歡 waiter 及 sell 屎 (雖然為了搵錢交租都要做), 二來在不久的將來我要搬兩次屋 (還好其中一次只是搬去隔離屋), 再者 12 月尾約了朋友上利物浦睇英超。可惜的是, 經過之前幾個月開工不足, 銀行的結餘簡直是直線下降!

這個星期還是過著慢活的生活, 準備迎接之後辛苦的工作吧。除了那遙不可及但仍然要照 send CV 的工程 (Building Services) 之外, 今次因為會留在英國較長時間 (其實我都唔知自己捱倒幾耐), 可以換埋英國車牌試下搵 van driver 以及試下 apply 我在香港諗都冇諗過做的 Barista 沖咖啡...

至於住的方面, 很感恩今次很順利, 因為... 我又再次地搵返那個 "19" agent 租屋。原因係我之前返香港退租, 佢一直都未退返按金俾我。琴日一到步就剷上去 agent 度, 我至知要 send e-mail 去指定地方要求退按金。再者我返香港之前又留了一些物品在舊屋 (俾班意大利仔 keep 住), 搬回舊屋附近可以唔駛咁煩。

結果呢間 19 agent 今次很 helpful, 一來就在我之前住那間屋的同一條街有吉房 (雖然要搬兩次, 結果同一條街的 6, 8, 9 號屋都住過 / 將會住入去), 二來佢俾我用之前未退的按金當在今次的按金, 又今次佢只收一個月按金 (上次要 1.5 個月), 最後仲有剩可以用來當交租。

咁我在 Upton Town (近 Stratford, 倫敦東邊 Zone 3) 租了一星期 AirBNB, 下星期又再次搬回西邊 Zone 2 的 East Acton......

坦白講, 再次踏入倫敦我沒有太大期望, 除了逃離香港的高壓生活以及無能政府外 (其實英國工作壓力唔算低, 而外國每個國家都係有佢自己的問題), 唯有見步行步, 到山窮水盡時, 求其去轉德國西班牙旅行就滾回香港去找工作吧。

當然, 我仍然有盼望去找到理想工作, 以及 "一個去兩個返" 的...

我在英國搵房搬之血淚史

在英國, 搵房搬比搵工更煩, 因為搵工你可以騎牛搵馬, 搵房除了要考慮工作地點的距離, 房租外, 仲要考慮租約長短, 間屋乾淨與否等等...

身為一個收入微薄的 working holiday maker, 基本上係唔會負擔得起整個單位的租金。而且一個人住仲要短期居留, 亦唔需要咁講究吧。上文講過我在英國第一個月租 AirBNB, 在東三區的 Leytonstone, 但因為準備搬走時, 我剛剛搵倒一份工作在 Turnham Green (西二區) 返工, 晚上 11 點收工要搭整整一個鐘 underground 才可返到 Leytonstone, 加上之前我期望佢會請的旅行社 CS (返 Canary Whaft, 東南二區) 泡湯, 咁我唯有死死地氣搵間近 Turnham Green 的屋, 方便我返工同埋在我 11 月尾返香港 "放假" 前 settle down, 同埋繼續騎牛搵馬...

在倫敦, 搵房主要用以下途徑:
1. 上網, 例如 spareroom.co.uk, gumtree.com, 不過當中有唔少廣告都係由 agent 貼文, 私人的盤源較少
2. 直接行入 agent 問有冇房出租
3. Facebook 專頁 / Whatsapp group / ybird 會有較多私人盤源, 好處係唔需要收仲介費, 同埋會有較多當地華人將自己的房出租

由於我 9 月 1 日要搬出 AirBNB, 於是我剩返大約 10 日左右就開始搵屋。而當時我又未正式開工, 所以搵屋地點對我就有點頭痕, 結果我一開始都係搵返 Leytonstone 的屋。

結果... 我睇左好幾間都唔合心水, 雖然平均租金都係大約每月 500 鎊左右, 第一間屋我去 agency 搵屋, 佢聲稱間屋新裝修同埋仲未有人入住, 但佢居然唔俾我睇屋...

之後, 又睇左幾間, 但唔係有一陣怪味 / 比較殘舊, 就係要焗我簽 6 個月租約... 由於我未 settle down, 剛剛先搵倒份工, 我都擔心自己 11 月會唔會頂唔順一去不返... 所以唔敢貿然租 6 個月。

經過一個星期之後, 由於我只剩返 3, 4 日就要搬, 而那份旅行社 CS 申請被拒, 我唯有向西區落手。最後我總共睇左 3 間 (都係月租 5xx) 房。第一間我覺得還可以, 但係屋主係黑人, 傳聞黑人會比較嘈吵, 所以都係去睇下先。第二間係 apartment, 計埋我只有 3 個人住, 間屋幾四正我好鍾意, 可惜屋主居然唔覆機 (而我只剩 3 日時間搵屋), 同埋最少要租 6 個月, 結果由被迫放棄...

第二日 (只剩兩日搵屋), 又睇左一間在 East Acton 的屋, 我睇 Citymapper 那裡有巴士到我工作地點, 而且行路都係半個鐘左右就到, 覺得可以接受, 又可以俾我短租, 於是去睇屋。結果間房原來係一個閣仔 (天台層), 租金又唔平 (月租 563 鎊), 仲要俾 1.5 個月按金 (呢個由佢, 因為退租有得拎返) 同埋 230 鎊仲介費... 諗左陣, 因為我唔想再煩搵屋, 結果半推半就之下簽了 3 個月租約至到 11 月尾... 還好間屋裝修尚算新淨, 廚房又大間, 咁就不如忍佢 3 個月先啦...





然後我花了 60 多英鎊去 IKEA 買被鋪, 再花了差不多 40 英鎊坐 Uber 搬屋... 但我連第一期糧都未出 (9 月中才有糧出)... 剛開了的銀行戶口, 結餘急轉直下...

不過計落, 就算我冇工開, 其實我都只係要俾多百多英鎊, 就已經可以交完 3 個月的租金, 至少我唔需要擔心呢幾個月冇錢交租, 再加上有兩份 part time 餐館工作, 變相都唔需要擔心生活費的問題。

住了呢個閣樓一星期, 又覺得呢度俾我 hea 真係幾一流。唯一係擔心遲下天氣凍, 房內小小的暖爐究竟夠唔夠暖...

同埋呢度 D 住客都幾 nice, 上星期六晚終於認識了我同屋的新朋友, 幾個意大利仔仲整左少少意粉俾我食。



有女友人話我隔離個意大利仔幾靚仔, 佢地仲估我 25 歲, 亞洲人係襟老一點。

但話說第一日搬過來, 當日傍晚 6-11 就即刻要返工。返工因為日光日白就可以行返去公司, 但放工我之前 research 有架巴士 (272) 只需十多分鐘車程, 結果那天收工至知那架巴士係半個鐘一班, 而且星期五六我收 11:30 的話, 只係剛剛好可以趕到尾班車... 不過有個好消息就係, 下星期開始, 倫敦搭任何巴士, 只要第一程同第二程相隔少過 60 分鐘, 第二程可以免費。咁我就算趕唔倒 272, 都可以搭其他車出 White City 再轉車而無須俾多 1.5 鎊車費。

好喇, 既然工作同埋搵屋都暫時告一段落, 而家可以好好 plan 下未來兩個月可以點樣過, 繼續騎牛搵馬 send CV 同埋 plan 下去旅行。

我在英國四圍闖蕩的日子

轉眼間, 8 月過去了, 來到 9 月, 代表我已經來到這個城市接近一個月, 亦表示著, 我明天就要離開住緊的 AirBNB, 搬去一個新的 town, 新的環境, 以及新的工作, 用三個月時間開始在這裡穩定下來, 亦要開始認真計劃未來一年 (其實去到年尾返香港小休, 再回來計返只有半年多點) 的生活係如何。

坦白講, 來到呢度唔輪到你有太多的 planning, 無論工作, 住屋, 很多很多事都沒有你想像中咁好咁順利, 神未應許天色常藍。

連日來心情忐忑不安, 在香港過慣安穩的日子, 毅然 (暫時) 放棄香港的一切, 來到一個從未踏足過的城市生活。倫敦沒有想像中咁多姿多采, 甚至連參觀古蹟都要被打劫入場費。

我相信, 一年之後, 我會有所成長的。要學懂照顧自己, 以至照顧別人。

我很感恩家中經濟環境容許我走出去闖蕩一年半載, 而無後顧之憂。我很感恩身邊朋友給我很多的支持和祈禱。你地在 facebook 上的每一個 like, 都變成了我繼續寫 blog 同發掘這裡不同景點, 趣事的動力。特別係每一次我擔心自己沒有足夠金錢去維持生活, 擔心自己離開工程界太耐會削弱競爭力, 擔心在這裡識唔倒朋友 (又唯有同台妹同事 R 下水吹先)。

要學懂一件事: "不要想著 11 月尾返香港就冇回程!", 要堅持在這裡至少到出年年中! (除非真係連交租都冇錢交吧)

好喇, 沉重過後就講下輕鬆的話題吧。來到英國一個月, 雖然我自問係廢青, 但總唔會日日呆在家中上網做宅男吧。倫敦好似好細, 又好似好大咁, 然後我發現我仲有好多地方未去過...

除了倫敦之外, 亦趁住呢個較空閒的時期去了好幾個 City 玩了一兩日。

(相片主要用 iPhone 拍攝)

幾鍾意今個月住呢個 town 仔 Leytonstone, 交通尚算方便 (Central Line Zone 3 尾), 得閒又可以去下 town 入面嘆咖啡同去麥記同大型超市 hea, 可惜因為離工作地點太遠, 要搬去老遠的 East Acton (Central Line 的另一端) 重新適應... 希望呢三個月可以轉倒工, 等我 12 月可以搬返去東邊啦!

點影都咁靚的 Regent Street / Oxford Street (Oxford Circuit / Piccadilly Circuit)

大英圖書館出面的檯子, 簡直係廢青上網的天堂

利物浦街車站, 我已經覺得靚, 但我仲未去過 Paddington, King Cross & St. Pancreas 朝聖...

大英博物館

Neal's Yard, 在 Covent Garden 附近, 幾鍾意呢條街仔

Camden Town, 

自然歷史博物館

Big Ben, 可惜電話冇電, 未能認真影下佢同國會大樓, 西敏寺

Greenwich

Brixton

除左倫敦之外, 都有幸去過好幾個城市

6/8, 7/8: 由於要探親, 去了一個靚到不得了的 town, 叫 Lichfield (Birmingham 再上少少)

11/8: 小型飛機初體驗 @ Colchester

13/8 - 14/8: Birmingham 其實幾悶, 唯一好睇就係呢條河

27/8: Seven Sisters Cliff (Brighton 相後補)

最後, 希望小弟 settle down 左, 打返一個月工後, 可以開始 plan 下出國旅行啦, 好想去荷蘭, 德國同埋西班牙...

我的搵工 fighting 歷程

趁住小弟剛脫離廢青行列 (人工根本未夠應付所有開支, 但總好過冇錢交租, 唯有騎牛搵馬), 終於要講下英國的搵工歷程。

來到呢度, 人生路不熟, 要搵工的主要有以下途徑:
1. 求職網站, 例如 Indeed, Totaljob, Reed 等, 就類似香港的 JobsDB, 適合搵文職 / 較專業的工作
2. 朋友 / facebook / WhatsApp group 介紹
3. 連鎖店 / 公司網頁, 例如 H&M, Uniqlo 的 sales 職位
4. 很多餐館門口都會貼招聘廣告, 特別係中菜館

呢度搵工其實好講求經驗, 基本上文職的話, 你無相關經驗都好大機會唔會請你。而我自己在香港做開工程, 另外有兼職 Telesales, 馬會電話投注同埋九巴車長經驗, 但係...

呢度的工程工好多都唔請 Tier 5, 因為大部份都係 perm 工, 而且有唔少都要求你有當地的工作經驗同電牌 (例如 "17th Edition Wiring Regulations", "City & Guilds xxxx"), 試問一個剛踏足英國的人又點會有英國的電牌? 至於呢度做巴士司機... 香港的巴士牌係不能夠 transfer 過英國的 (只可以 transfer 私家車, 輕型貨車同電單車牌), 而 Stagecoach (某大巴士公司) 的網頁亦講明如果想入去 training 同考牌, 需要有簽證有效期 30 個月以上...

當然如果有車牌而手車又 OK 的話, 都可以試下應徵 Van 佬, 人工會比餐館好一點, 但好多都要有經驗, 而且要申請英國車牌, 方法係上英國政府網頁要求佢寄張申請表俾你, 填好後要連同 BRP (會發還) 同香港車牌 (不會發還, 返港後要俾 $50 補領), 連證件相及 43 鎊 (可用支票或者去郵局交錢) 寄上去指定地址, 大約三星期後會還俾你。由於小弟騎牛搵馬中, 仲要搵屋, 不能將 BRP 被人沒收三星期, 所以都係遲下先算。

結果我唯有做住 Waiter 騎牛搵馬。不過如果響呢度做中菜館, 因為工時長, 講緊一星期返 50-60 個鐘, 人工可能比起做文職同 sales 更高, 甚至拍得住一個工程界 fresh grad 的人工, 加上做得餐廳就至少有兩餐俾你食 (甚至三餐), 變相除左屋租 (租屋另外開文講) 同搭車 (包月約百幾英鎊, 視乎距離) 外, 就冇乜其他消費, 可以慳錢用大假去旅行。

順便講下呢度 annual leave, 如果返一份工係每星期返 5 日, 咁你每年就最少會有 20 日年假 (返 4 日就 16 日, 返 6 日就 24 日), 再加埋 8 日 bank holiday (如果餐館呢類要輪休, 就一定要補假, 多數都會計多 8 日落 annual)

話說我搵工心路歷程係咁的:

Day 1:
來到呢度第五日 (首個星期一) 開始 send CV, 即日就有獵頭公司 (專幫 engineering / construction 公司搵人) 打來搵我 review 一下 CV, 結果當日下午就去了 Liverpool Street 火車站一間酒吧 (係酒吧!) review 我張 CV, 結果當然係石沉大海

Day 2, 3: 繼續 send CV...

Day 4: 有另一間獵頭公司有工介紹 (都係 engineering), 佢居然要我 send 證明我可以響度合法工作 (即係 Passport 同 BRP), 問過 AirBNB 屋主同朋友意見, 佢地居然叫我照 send (但我未收倒 offer), 最後 send 完又係石沉大海...

Day 8: 由於冇工做好冇安全感, 同埋好悶, 又唔敢亂 fing 錢遊埠, 結果呢日開始 send CV 去連鎖店, 同埋開始去唐人街派 CV...

Day 9: Day 1 那間獵頭又打來話有工介紹, 結果又石沉大海...

Day 12: 朋友介紹去做某旅行社 CS, 本住一試無妨心態 send CV, 結果佢話下星期一 Phone Interview, 另某連鎖店叫我下星期一 in part time

Day 15: 旅行社 CS Phone Interview 成功, 星期五上去 2nd in, 另某間日本餐廳有 waiter 空缺, 仲傳說有日本妹, 韓國妹同事, 結果即刻去 in 就請左, 星期日 (後來改為星期五) 返工。由於有 offer, 結果我冇去 in 某連鎖店

Day 20: 話說昨日上旅行社 2nd in, 傳聞話有得 2nd in 都好大機會成功, 結果今日收倒 e-mail 居然被 reject........................ (呢一下, 我覺得西人真係幾西, interview 果陣係咁話 excellent, 轉個頭就 I don't even give a sxxt)

Day 22: 某中菜館叫我星期三去見工, 由於工時比日本餐廳長, 所以人工會好一點... 不過返日本餐廳好處係你可以搵多份 part time, 想去旅行時就唔返 part time 以及要求兩星期的 day off 連放 (Updated: 中菜館俾我下星期用 part time 形式試工)

咁就唯有返住日本餐廳先, 同事有 日本妹, 韓國妹, 台灣妹, 馬拉妹 同埋 香港妹, 廚所就主要係香港人同馬拉人。第一日返工, 學做水吧, 要整果汁, 開酒, 都幾辛苦, 特別係收工前要清吧。還好做左兩日都開始上手, 台妹 (唔駛幻想喇, 樣子一般) 變成我返工的動力... 同埋間餐廳都幾乾淨企理。

呢度每星期只返 40 個鐘 (4 x 10) (時薪 7.2 鎊, 最低工資), 扣埋稅後月入只有一萬多點 (其實好多 Working Holiday Maker 都係逗咁上下人工), 不過如果你熱愛旅行, 就可以預早通知經理, 將兩星期的 day off 連住放, 就可以不用請假去旅行喇。如果唔夠錢用又可以搵多份 part time (當然人工越高徵稅就越重)



當然, 比起香港返兩份工 (再加上做左好幾年工程, 職位同人工都已經有咁上下), 呢度人工真係比香港低一大截... 甚至覺得響香港搵錢, 每年去一次歐遊, 都可能好過響呢度邊打工邊旅行 (係慳倒機票錢), 唯有調整心態, 享受下呢度的人和事, 用謙卑一點的心態去面對呢度的種種困難, 響呢度生活一年半載, 體驗一下, 一定會有一些改變吧。

下次講搵屋, 搵屋比起搵工更煩, 深感到西人真係沒有最西只有更西...

細數英國兩三事 (生活篇)

轉眼來到英國 12 日, 都開始要融入一下倫敦的生活了。(唔好成日俾上星期果篇飛機 post 呃左先得架!)

上次太眼訓冇講到間 AirBNB, 我間房一眼睇哂, 連書檯都冇, 幸好屋主兩三日內買了一張很細的檯仔, 俾我可以擺部 Notebook 上去。



屋主係英國人, 但早年移民左去新西蘭, 近年又返左英國 (我見佢 AirBNB仲有幾間屋響法國, 蘇格蘭同新西蘭), 話說佢剛剛出左發去新西蘭兩星期... 同屋仲有一對 couple, 約 40 歲, 女的係波蘭人, 後生時已經來左英國打工。男的就國藉不明。間屋有 4 間房, 仲有一間大房都擺左上 AirBNB, 之前有韓國家庭來住左三晚, 呢幾日又有法國家庭響度。

間屋在一個叫 Leytonstone 的地方, 在市中心東北面 Zone 3, 離市中心 (Zone 1) 大約係荃灣至旺角的距離。但倫敦以至全英國的交通費都好貴, 由我屋企搭 underground 出市中心, 用 Oyster (類似香港的八達通) 單程收費大約係 £2.8 (即係約港幣 $28), 而且基本上你係冇其他選擇, 因為呢度 D 巴士, 基本上 Zone 3 打後的係唔會出到 Zone 1, 而且市區唔會有高速公路, 架架巴士都係站站停 (連我呢條巴膠都搭到怕)。還好呢度搭車有星期票同季票, 例如我買 Zone 1-3 星期票就 £38, 月票就 £146, 仲可以搭哂 Zone 1-6 的巴士, 變左車費上都有點預算...

呢度的 underground, 有好幾條線因為起左百幾年 (或者幾十年), 舊隧道很細條, 所以列車都好細架, 而且因為散熱問題係冇冷氣的, 夏天搭都幾焗... 而有幾條線因為行淺層地底, 隧道比較大條, 所以列車都較大架, 同埋最新換的新車開始係有冷氣。

所以, 搭過倫敦的公共交通, 就會覺得成日壞車年年加價的港鐵, 都好過倫敦的 underground 一萬倍... (倫敦 underground 一樣年年加價同會突然關閉做保養, 又或者欠人收車), 同埋, 香港 D 巴士真係好快...


我成日要搭的 Central Line, D 車好焗, 但搭過 Bakerloo Line 至知一山還有一山高...


Underground 站都幾細, 同埋大部份月台同車廂中間會高 / 低一級

在英國 10 餘日, 發覺倫敦 (以致全英國) 成街都係 Restaurant & Pub, 同埋 Cafe, 而英國人真係可以飲酒當食飯, 又或者 Happy Hour 放左工先去飲酒, 再食晚餐, 尤其係星期五同六, 基本上 Restaurant & Pub 都逼滿去飲酒的人, 甚至 D 醉酒鬼可以周街 / 在交通工具上叫囂。

例如上星期五同兩個香港朋友到 Camden Town 食飯, 我地夜晚 8 點幾先坐低, 入面一個食客都冇, 但食食下居然有好幾檯人入左來食飯, 大概都係響附近 Happy Hour 之後先來食飯的人吧。更甚係我曾經有獵頭公司搵我傾 CV (搵工另外開文講), 佢地居然約我到 Liverpool Street 車站入面一間 Restaurant & Pub 一路飲野 (有酒 / 果汁) 一路傾 CV...


星期五晚的 Camden Market, 大量遊客在此飲酒同掃街

另外英國人亦很喜歡飲咖啡, 英國咖啡比香港 (例如 Starbucks) 平, 大約 £2 - £3 已有交易 (平的我飲過 £1.3, 不過份量較少), 加上你買杯咖啡, 或者買多份三文治 (約 £3), 基本上可以坐大半日, 非常適合我呢類廢青坐定定 send CV (笑鳥)。


飲過咁多咖啡, 最平係呢間, 咖啡 £1.3 三文治 £2。

至於英國外出食飯... 都係算吧啦, 同香港比佢唔算好貴 (至少冇搭車相差咁大), 正常食一個快餐 £5-6 左右, 出去食餐好少少的就十幾廿鎊, 但質素真係同香港差得遠... 食過咁多餐, 最好食的竟然係坐完小型飛機, 同朋友在 Marks Tey 食的一餐中菜 (一人約 £20, 有香港美心咁既質素)...
甚至有好幾餐都中過伏, 例如冇套餐, 飲杯咖啡要另外俾錢, 又或者貴得來但唔好食... 另由於英國有很多印度人, 所以周街都有好多印度餐廳 / Take Away 有 Kebab (肉卷) 食, 兼賣漢堡飽同薯條, 價錢相對合理 (£6 可以食到好滿足)。


最滿足係呢一餐中菜

不過, 由於小弟仲未脫離無業遊民行列, 而我自己整下意粉都擺得落口, 所以而家都開始自己整下野食, 慳錢之餘又可以打發下時間...

今日講到呢度先!

出發! 英國 I'm Coming!

終於到了呢一日, 心情有點覆雜,

開心的係終於可以一試自己一個人歐遊的滋味, 同埋 (暫時) 放低香港的人和事去外國闖一番。

多謝屋企人今日送我機, 入閘果下眼濕濕幾乎要爆出來, 都係唔好係咁望返轉頭喇。



坐左 12 個鐘頭機 (我用 Asia Miles 換國泰機票, 中午上機), 第一次搭咁長途機, 全程完全訓唔著覺, 都係睇戲, 食飯, 聽歌, 搞下部電腦 / iPad (冇野睇), 食飯, 睇多套戲, 行下去下廁所, 臨落機先眼訓...



到 Heathrow 後, 排左接近一個鐘先出到閘。由於小弟資金有限, 唔想浪費金錢搭 Uber 或 Heathrow Express, 結果都係搭廿幾三十個站 underground (Picadilly + Central), 再行十幾分鐘先到位於 Leytonstone (同 Heathrow 一東一西) 的 AirBNB。呢個就係今個月我的住處, 直至下個月 1 號。



間房比想像中細, 同埋舊, 而且位置有點不便, 對面有個小森林, 傍晚會有狐狸出沒... (按: 倫敦周圍都有狐狸)





由於實在太眼訓, 之後再講。

前言 - 仲有四日就出發喇, 既緊張又擔心

仲有四日就出發, 其實好多朋友都知道我準備去英國 Working Holiday。最有趣的是, 個個人都有唔同反應。

感恩的是, 家人和不少朋友都好支持我呢個決定。雖然都有一些唔太支持的聲音出現, 主要係怕影響事業。衡量過之後, 我諗倒錢幾時都有得搵, 但如果唔去 Working Holiday, 就超齡冇得去, 再加上自己年初升左職 (即係唔係搏紮), 細佬今年又畢業, 屋企又冇乜負擔, 俾自己去試兩年又好, 一年又好, 我覺得值得。

其實去 Working Holiday 呢個 idea 幾年前已經有, 主要係聽身邊朋友講, 去一轉 Working Holiday 會擴闊倒自己視野。至少你會學識在無人無物的情況下, 會迫自己成長同要自己面對同解決種種問題。至於點解我會去? 其實又冇一個好具體的答案, 也許都是想體驗外國生活, 擴闊視野, 同埋 搏搵倒份工俾我可以轉 Tier 2 最尾入英藉, 再娶個鬼妹 唔想將來後悔有機會去時唔去吧。

咁點解我又會揀英國? 主要係自己除左中文同英文外, 就唔識其他語言 (雖然傳聞去德國都唔需要識德文), 再加上英國比起澳洲同德國, 簽證可以簽兩年, 而且可以同一份工做足兩年 (澳洲同一個僱主只可做半年), 而且英國去歐洲其他國家夠近, Ryanair / Easyjet 大量平機票供應, 方便小弟周圍去插旗 (嘻嘻)。

自從上星期五辭職後 (很感恩呢兩年學倒好多野, 上司同事都很好), 呢段時間都係返下 part time, 約下唔同朋友食飯咁樣, 多謝各位朋友 farewell 我。仲有, 係咁洗錢買野準備過英國...

心情既期待又有點擔心, 因為傳聞英國失業率都幾高 (主要係資源錯配同埋福利好, 低下階層寧願拎救濟金), 再加上自己做開建築工程, 英國雖然都多樓起同工程師短缺, 但係唔知請唔請華人甚至我只係拎住兩年 Visa... 做餐館又夠唔夠應付生活所需同埋儲錢去歐遊? 不知道。但既然有那份豁出去的豪情, 離開呢個安舒區, 就唔好顧慮咁多啦!

略略講下我申請 Working Holiday 的流程: (申請方法出面好多 blog 有講, 略)

舊年 12 月 / 今年 1 月: 決定今年 7-8 月出發, 開始留意網上資訊, 同埋被 add 入 WhatsApp Group 交流下

4 月初: book 左時間去照肺 (申請 Visa 必須, 連 report 一齊交上簽證中心), 約左 8/4 照肺, 23/4 拿回肺片及 report。

17/4: 上網約時間交文件 (約左 6/5), 並俾錢做 Visa (225 英鎊) 及 IHS (申請英國 Working Holiday 必須一次交兩年醫保, 英國政府收, 300 英鎊)

6/5: 上簽證中心交文件, 要扣留護照, 就算用 BNO 申請, 都要留低特區護照, 或者成本特區彩印俾佢, 如果期間要出國就要小心 (我 book 左機票去台灣, 要成本特區彩印, 以免冇護照出國)

13/5: 響 Visa 未批之前, 居然大膽地用 Asia Miles 換左去程機票, 另因為年尾有段時間要返香港, 見維珍有平機票 (來回連稅 $35xx), 結果心動不如行動...

24/5: 收倒 e-mail 有結果返來 (e-mail 唔會話你知申請成功與否) 同可以上去拎返護照 (此段時間我在台灣旅行)

27/5: 上去簽證中心取回護照, 簽證獲批, 日期由 17/7/2016 至 16/7/2018

留意的係, 申請成功的話, 係必須在簽證起旗後 30 日內 (例如我就一定要在 8 月 16 之前) 入境英國, 並於到步後 10 日內去指定郵局拎 BRP (Resident Permit, 行街紙, 身份證咁既 size)。我有同事申請左澳洲 Working Holiday, 佢話澳洲係入境當日先開始起旗計一年的。

然後 6 月初及 6 月中工作非常繁忙... 6 月尾就開始有時間搞下呢樣搞下果樣, 搞下搞下就仲有四日出發喇, Good Luck!